ابتزاز واستغلال 6 فتيات جنسياً ومادياً بطريقة وحشية، كلنا بنعرف انو التكنولوجيا سلاح ذو حدين وهالشيء ما بيختلف عليه اثنين، بس خليني احكيلكم انو التكنولوجيا بزماننا هاد أصبحت كارثة بل ومصيبة على من يقتنيها، حتى وإنْ بلغ حرصه أقصى مراحله، لكن ممكن تسقط منه هفوة صغيرة توديه ع جهنم، وهادا الي صار مع ضحايا قصتنا المأساوية، الي ما بتتصدق مع الأسف ولا يمكن تخطر أحداثها ع البال، تابعوا القصة حتى تعرفوا شو صار مع ال 6 صبايا.
ابتزاز واستغلال 6 فتيات جنسياً ومادياً بطريقة وحشية
اثناء عملي في وحدة الجرائم الإلكترونية “سايبر وان ” بصلني تلفون مستعجل جداً من صبية منهارة من البكاء وصوتها واضح جداً عليه التعب والانهيار، بتقول بدي احكي مع احمد بطو ضروري جداً مسألة حياة أو موت بقلها تفضلي انا احمد، بتقلي انا تعبت بطلت قادرة اكمل يختي الحياة بس بفكر انتحر واخلص من الدنيا والي فيها، ولا بدي شي من هاي الدنيا، بقلهابس ممكن اهدي شوي واحكيلي حبة حبة شو شو القصه وبوعدك بحللك ياهل إن شاء الله ، بتحكيلي في شب صرلو بهددني شهرين واكتر لا بعرف انام ليل أو اعيش نهاري عادي زي باقي البشر، بطلت عائشة حياتي زي البشر العاديين، وكثير تعبانه منو، سألتها بتعرفيه الشخص الي بيهددك ؟ حكتلي لا ما بعرفو نهائي؟
فسالتها بشو بهددك بالظبط بتقلي بصور وفيديوهات خاصة جداً ومحرجة وعارية؟ بقلها كيف يعني انتي بعتيهن لحدا أو شو القصة؟ قلتلي والله ورحمة امي تحت التراب ما بعتهن لحدا نهائي ؟
سالتها لعاد كيف وصلو قلتلي ما بعرف ؟ قلتلها متاكدة ما بعتيهن حكتلي والله العظيم اه ولا عمري ارسلك شيء لاي حدا ولا يمكن اعمل هيك شيء اصلا؟ طيب هل في حدا مسك تلفونك قبل هالمرة حكتلي كمان لا مستحيل حدا يمسكون أنا م بخلي اي حدا يمكسكو غير اني حريصة جدا وفش عندي ثقة بحدا ! وهنا انا بيني وبين حالي قلت في اشي غلط ومستحيل اكيد ولا يمكن مع كل هالحرص ما يكون في شيء غلط او هي بتكزب عليا يمكن ! بتقلي اليوم بهددني اذا ما بصور أختي بالحمام وهي بوضع عاري وبتحمم راح يفضحني وينشر صوري وفيديوهاتي في كل مكان ويفضحني بين معارفي واهلي ! وغير هيك حاسة حالة صرت ممثلة افلام اباحية من كثر الاشياء الشنيعة والفظيعة الي بيطلبها مني كل ليله وبيطلعلي بطلب جديد ومقرف ومخزي انا اختنقت ع الآخر و بطلت اقدر لتهديداته والله اذا طلعو الصور ولا حدا راح يصدقني واخوتي راح يقتلوني ولا رح يسموا عليا!! مشان الله أنقذني بأي شكل وبأي طريقة حياتي مش حياة.
ابتزاز واستغلال 6 فتيات جنسياً
قلتلها تمام ابعتيلي كل التفاصيل وكل الي بيسير معك بالزبط وبدون اي كزب أو تحريف حتى اقدر اساعدك بالشكل الصحيح ونمسكو متلبس، وبرجعلك بجواب وفعلا بعد ساعات رجعتلها حتى نعمل خطة بس فجاة كل التهديد توقف فجأة ! قلتلي عملت اشي حكتلها لا بعدني مش مبلش حكتلي كيف هيك اكيد بتمزح قلتلها والله لا ! حكتلي على كل حال اذا صار برجع احكي معك. بعد اسبوع بالزبط وفجأة بنص الليل صبية تانية بتوجهلي بنفس المشكلة ونفس الي صار مع الصبية الاولى وتهديدات غريبة عجيبة غريبة والبنت بتحلف ما بعتت الصور لحدا حتى خطيبها ما شاف هيك اشياء ولا يمكن تبعتها والبنت واضح احترامها فعلياً وكل الاحداث غريبة وعجيبة ولا يمكن تتصدق انو البنات فعلا ما أرسلوا صورهم لاي حدا تاني كانت، وهنا بيني وبين حالي حكيت اكيد بكذبوا وباعتينهن او حدا ماسك التلفون!!! وفعلا بعد ما توجهت اوقف التهديد للمرة التانية وفجأة بدون اي سابق إنذار كمان مره وبدون ما اعمل اشي فانا قلت غريب واكيد.في شيء ورا الموضوع.
عدا كم يوم والا عدد من الصبايا بتوجهن الي انو صورنا نسحبت وما بعتناها لحدا واحنا تحت الابتزاز والاستغلال الجنسي واول ما يتوجهولنا بتوقف التهديد قلت لا في اشي مش طبيعي
حل قضية ابتزاز واستغلال 6 فتيات
فقررت افتح تحقيق كبير واربط كل الحالات مع بعض مع استخدام تقنيات جدًا متقدمة لانو لا يعقل انو 6 بنات ما بعتو صورهم لحدا وهني تحت الابتزاز والاستغلال الجنسي واول ما يتوجهولي يتوقف التهديد نهائي ولا يرجع ! وهنا تأكدت انو الموضوع كبير وفي إن فعلا، وبعد البحث والتحقيق والتحري المكثف عن البنات وهواتفهم وكل ما يخصهم واستخدام اقوى أجهزة التحري والبحث اتضح معي انو أجهزة الفتيات مراقبة وموجود فيهم برنامج تجسس بالكامل على الجهاز ع كل البرامج وتحكم تااام بالجهاز! واول ما كانو يبعتولي المبتز يكشفهم ويشوف كل شيء ويعمل بلوك ! فهون قدرت اتواصل مع اخت الفتاه وحكتلها خلي اختك تطفي التلفون اسا فورا بدون اي تردد ولا تضييع وقت وتحكي معي من تلفونك وبغرفة تانية !! فسالتها اول سؤال من وين اشتريتي تلفونك ؟؟؟؟ من الشركة حكتلي لا! مستعمل وبسعر رخيص ومش غالي كثير، ومن يوم ما اشتريتو صارت معي المشكلة وبدأت اتعرض للابتزاز، وفعلا قدرت احكي واتواصل مع باقي البنات عن طريق اطراف تانية وجوابهم كان نفس الاشي انو اشترو التلفون مستعمل وصارت المشكلة بعد فترة بسيطة جدا من استخدامهم للهاتف، فحكتله وخبرتهم انو اجهزتكم مراقبة بالكامل وبقدر يفتح مايك وكاميرا و يتحكم وبعمل شو بدو بالهاتف تبعكم بسهولة تاااامة ! وهون فوراً البنات طفو التلفونات وطلبت منهم يجيبوا هواتفهم عندي على الشركة بالمختبر حتى افحصهم فحص دقيق وفعلا بعد الفحص والتحقيق قدرت أجمع الأدلة الدامغة ضد الشخص الي استغل ال 6 بنات جنسياً وللأسف الشديد تنتين منهن فقدو عذريتهم بشكل كامل بسبب هاد الوحش غير الطلبات المقرفه والمقززه والشيعة الي كان يطلبها منهم يعملوها حتى يرضي غريزتو الحيوانية ويستغلهم مادياً.
وبفضل ربنا قدموا البنات شكوى ضده في الشرطة وانا ارفقت الادلة الي بتثبت إدانته وجريمته القذرة وفعلا تم القبض علية متلبس وانحلت المشكلة على خير بدون اضرار اضافية.
التوعية
ومن هنا عزيزتي الصبية وحتى الشباب والاطفال ولكل شخص بيقرأ هاي القصة، ضروري جداً ننتبه للزمن الي نحنا عايشين فيه ، وما نأمن لاي شخص ولا حتى لأنفسنا لانو ممكن بلحظة ضعف نغلط والغلط هادا يكون سبب هلاكنا وتدمير حياتنا وعوائلنا، لهيك رجااااءا ما تصورو أنفسكم وانتو بأوضاع مخلة او حرجة حتى لو بعض الشيء على أجهزتكم او هواتفكم حتى لو كانت من الشركة نفسها فلا تأمنوا لاي شخص على الانترنت لانو هواتفكم طالما أنها متصلة بالإنترنت فهي مراقبة وعرضة للاختراق بأي لحظة، وبتروح علينا
ومهم جدا انو ما نشتري اجهزة مستعملة من محلات التلفونات او اي شخص لانو ممكن يكون راكب عليها برامج تجسس ويتم اسقاطكم وابتزازكم وفي الشهر الاخيرة تم اكتشاف اكثر من 15 هاتف مستعمل مراقب مستعمل بدون معرفة الشخص لهيك يا ريت نكون واعين ونتعلم من اغلاط غيرنا واذا نفرض علينا نشتري جهاز مستعمل يا ريت نعملو فورمات مرتين او ثلاثة .
لازم دائما نكون واعيين للتطور الي احنا فيه كونه مش بس نعمة بل هو نقمة بحد ذاتها, وخلينا نكون حريصين وأكثر فهم، وياريت تنشروا القصة على اكبر نطاق حتى تصل للكل والكل يكون حريص أكثر ويتعلم من أخطاء غيرو ولزيادة الوعي.
أتمنى من الجميع مشاركة المقال على نطاق كي تعم الفائدة على الجميع، لئلا تكن الضحية القادمة من اهلك، أو أحد معارفك!
تحياتي المهندس احمد بطو مختص امن المعلومات والجرائم الإلكترونية
وسفيراً لنوايا الحسنة لمنظمة يونتيك الدولية للأمان على الإنترنت
جميع الحقوق محفوظة لشركة سايبر وان المختصة في الامن السيبراني والجرائم الإلكترونية لا يحق لكم نقل او اقتباس اي شيء بدون موافقه الشركة قد يعاقب عليها القانون.
للتواصل info@cyberone.co
