والد زوجها يبتزها جنسياً ويهددها
لا تثقوا بأحد إطلاقًا
صعب نتخيل مدى حقارة الناس وشناعتهم في هالزمن، مع الاسف أصبح كل شي جايز ومتاح وفي متناول الايدي، ومن الصعب ع الإنسان يحافظ ع حاله حتى من اقرب الناس اله، وقصتنا اليوم مثال واضح على شناعة البشر، فتاة تعرضت للتحرش والاغتصاب والابتزاز من والد زوجها الي المفروض يكون بمقام والدها، اقرأوا القصة لتعرفوا التفاصيل المريرة الي عاشتها البنت مع هالعيلة المنحطة أخلاقياً.
خلال عملي اليومي في حل مشاكل الابتزاز الإلكتروني والتهديد والقضايا الأخرى، وخلال ما بعمل جولة على الناس الي ببتراسلني وبترسلي رسائل ومحتاجة مساعدة، اذا بتصلني رسالة لحقني بسرعة أنا في عرضك راح انفضح اذا ما نفذت طلباته الوسخة والدنيئة ومعيش وقت نهائي، دخيلك ترد علي الوقت مش لصالحي بالمرة بترجاك !! حكتلها تفضلي شو القصة خيتا واحكيلي كل التفاصيل بكل صراحة حتى اقدر اساعدك واردلك حقك كامل مكمل إن شاء الله!! حكتلي شكرا كتير انك رديت، ويكون ممنوتك اذا حليت مشكلتي انت بجد رجعتلي الأمل لحياتي والله لو شو م اشكرك م رح أوفيك حقك.
والد زوجها يبتزها
والقصة وما فيها انو انا تجوزت من جديد بشخص عندو مشاكل صحية كثير وما بشوف منيح وحركتة شوي بطيئة ومعدوم الشخصية بين اهله، وانا بس وافقت لاني بدي السترة والاولاد ولاني كبرت بالعمر شوي فما اهتميت كثير لموضوع الشخصية والأمراض وقلت ضل راجل ولا ضل حيط، وبصراحه بعد الجواز حبيتو كتير على الرغم من أمراضه الكتير بس هو انسان زوق جدا وبحترمني كثير ومقدرني بس المشكلة الأساسية والكبيرة والي مأثرة ع حياتنا ومنكدة عليا بل ومخربة حياتي بالمعنى الفعلي وحتدمر من وراها انو اهلو كثير حشرين وبتدخلو بكل اشي بحجة خايفين على ابنهم وأولهم عمي ابو زوجي كثير حشري وعينو بيضه بس كنت اكذب حالي كتير واقول مش معقول هاد ابو زوجي زي والدي طبعًا غير اولاد عمو الي زي ابوهم بالطبع والوقاحة وقلة الحياء والي بيجو مخصوص قال يشوفو جوزي بالليل متأخر وهما الي بحياتهم ما كانو يزوروه ولا بيتعرفوا على اخوهم أصلا بس عشان يتفرجو عليا ويطلعو علي نظرات عاطلة ووقحة جداا ، وطول الوقت واحد منهم بقول لجوزي ما شاء الله مرتك فرس عربي أصيل جامدة طبعاً جوزي شخصيتو ضعيفه وع نياتو بقلو تسلم وهو مش فاهم المعنى الحقيقي لسفالة اخوتو وحقارتهم. فرد عليه اخوه اي لو عندي .. وما كمل فحكيتلو عفوا ؟ بقلي لو عندي صحن البزر بقلو قربو عندي شو فهمتي انتي ؟ وبتغابى عليا وبلش يتسافل بنظراتو الوقحة اكتر واكتر و بدو يوكلني اكل ويضلو لساعات متأخرة كل فترة وفترة يرجعوا نفس الاشي.
وآخر فترة عمي ابو زوجي هو الي بلش يتردد عنا كثير علبيت ونظراتو الي غريبه ووقحة وكلها قرف ويعمل حالو يساعدني وعارفه انو بلزق فيه كتحرش لاني حسيت مره بشكل مباشر وبعدها بفتره صغيرة الاشي صار يطور اكتر واكتر واي فرصه يحتك فيه يحتك غير نظراته غير انو يظل ملزق بجوات دارنا بحجة جوزي ويوم من الايام اجا واحد من إخوة جوزي يخوذو ع(دور بكير) لانو انا معيش رخصة سواقة، وبهاد الوقت انا روحت اكمل نومتي لانو كنت مريضه يوميتها بليل وما نمت والله بتفاجأ عمي ابو جوزي بقلب البيت وانا الله يسامحني طالعه بقميص نوم قصير ومفتوح كثير صيحت وانصدمت شو بتعمل هون بحكيلي في ريحة حريقة طلعت أركض بقولو كيف فتت بحكيلي انا معي مفتاح لضروره ما بعرف الواحد شو بصير معو وضل نازل تحت. ومن يوميتها ما شفت الخير وصار يتردد علي ويسال كثير ونظرات اكتر من قبل وصار يتجرا اكتر واكتر عليا وصراحة صار يدايقني كثير وكان يستغل كل طلعه لجوزي واخر مره طلع عندي بسالني عندكو مي بالحمام وانا من غبائي فتت افحص الحمام والا لحقني وحشرني بلحمام وبحكيلي تعمليش حالك شريفه مانتي بتبعتي صورك لشباب، والظاهر كان فايت من قبل ومصورني صور بأوضاع غلط بدون م اعرف وانا نايمة ومش منتبهة وفرجاني صوره وحكالي والله لاطلقك يا …. وارن لاهلك يسحبوكي صرت اترجى فيه مع اني مش غلطانه بس اهلي بقبروني ما بفهمو ومعقدين كثير وانا اصلا تزوجت حتى ارتاح من القعدة بوجههم، والصراحه كان عندي مشكلة مع قرابه الي تبلى علي وظلمني والله والله اني مظلومة مش بكفي مع اهلي كمان مع اهل زوجي، فخفت كتير وضعفت حكتلو خلص خلص مستعده شو بدك بعمل والي بدك بيسير بس اتركني بحالي فورا والا تهجم علي واعتدى علي وحسن حظي ما كمل سفالتو الحمدلله والا بيدق الباب وراح يفتح لمرتو الي هي مرت عمي ولما طلعت لها صرت اعيط وتحكيلي مالك بحكيلها مسكينه مضغوطة وتحكيلي مالك مالك شو في بقلها مدايقه من الحياه بقلها تعبانه بتسالني من ابني ومش متأقلمة بتحكيلي لا ومن وساخه عمي اجا حضني وعبطني قال متل بنتي انتي انا هون تجمدت ومش عارفه شو اتصرف وبعدها نزلو عبيتهم ومش عارفه لمين بدي اشكي همي لجوزي المسكين شخصيتو ضعيفة.
ويوم من الايام استغل فش حدا وطلع فتح البيت وفات عندي وقلي بدي اعملها معك مره وخلص وبتركك بحالك يا بفضحك كل الصور معي وبلش يقرب مني ويضغط علي وانا امنعه بس ما قدرت واغتصبني الحقير بدون رحمة ولا كأني متل بنتو او مرت ابنو وبنفس اليوم مش عارفه شو اعمل انتحر ولا اسجلو مش عارفة شو بعمل والله خفت صراحه من كل الناس صار عندي فوبيا يقلبو علي وضليت ساكته وهو يكمل عمايله حتى قدام ابنه يعمل حركات مشينه وابنه مش منتبه و يستغل ضعف نظر ابنو ولمره طلب مني طلب لا يمكن تسدقو ولا يخطر ع بالك بيقلي بدك اتركك بس بدي تجيبلي ولد مني حكيتلو مستحيل لو بموت ما بعملها، قلي لعاد اتحملي معك ليوم الثلاثاء والا فش راح اطلقك وابعت الصور لاهلك والكل يعرفك على حقيقتك وتنفضحي وتنقتلي !!
انا هون صراحة انصدمت من الوحشية الموجودة والحقارة الي بهالدنيا وحكتلها ماشي ولا يهمك راح اقدر اساعدك بتقلي قبل الوقت يعني بحكيلها اه وقلتلتي بسرية تامه مشان الله واه بديش حدا يعرف ! قلتلها اكيد طبعا ورجعت اكدت علي قلتلي والله ما بدي احمل منو والله بمووت وحياتك بترجاك انا انسانه ضعيفه وما الي حيلة ولا حد يساعدني، اذا ما ساعدتني راح احمل منو او انتحر قلتلها خلص ولا يهمك راح ساعدك باذن الله تقلقيش.
وهون بلش شغلي واتفقت مع الصبية على خطة معينة انو نوقعو وبفضل ربنا نجحت الخطة. وقدرت اوثق كل اشي بالصوت بالفيديو واجمع كل الأدلة على هذا الشخص عديم الضمير والحيا والدين وبعدها رفعت تلفون للمبتز والمغتصب وحكيتلو كل اشي موثق وبعتلو مقطع شو رايك انزلو عندي على الصفحة وهون الشخص خاف وارتعب وصار يترجى وشو بدك انا حاضر وفعلا نفذ جميع شروطي ممنوع يطلع عندهم اطلاقا ولا يحكي معها مع اعترافه وكل اعمالة الوسخة لانو الموضوع حساس وما بدها تحبس الشخص بس بدها تخلص الموضوع بدون شرطة بس لسوء حظه اكتشفت انو بهدد وببتزز وحدة تانية والي هي كانت سبب انو يوقع من حساب مزيف وفعلا الصبية اتوجهت الي قبل أسبوع مع ربط الاحداث والأدلة قدرت احبس الشخص بفضل ربنا بقضية ابتزاز وتهديد مع انو كان هدفي احبسو بالجريمة الي قبل بس لآسف الوضع جدا صعب وممكن البنت تنقتل بس جبت قسم من حقها وانتهت القصه بسلام وبدون قتل او فضيحة.
رجاءا يا عالم وخصوصاً للبنات ما تأمني لحد ما تأمني لا لاخوكي ولا ابوكي ولا اخو زوجك ولا عمك والد زوجك الحمووو الموت تزكري دائما، و ما تعطيهم فرصة بأي شكل من الأشكال ولا بالغلط حتى انتبهي قدامهم، والرجال ضروري تخافوا ربنا وتعرفوا انو اي شي بتعملوه لاي صبيه بيرجعلكو في زوجاتكم أو بناتكم او اهلكم، خافوا ربنا خافووو ، واي حد بيعرف اي شخص بيتعرض لهيك ابتزاز يبلغ م يسكت عنه لازم دائما نفصح المبتز وع الأقل نبلغ عنه ونوقفو عند حدو.
شهريا بصلنا لا يقل عن 50 حالة مشابه حول الموضوع لهيك تسكتوش قبل فوات الاوان ويا ريت مشاركة المنشور مع اكبر عدد ممكن حتى هاد المنشور يساعد ضحايا بهاد الموضوع.
تحياتي المهندس احمد بطو مختص امن المعلومات والجرائم الإلكترونية
وسفيراً لنوايا الحسنة لمنظمة يونتيك الدولية للأمان على الإنترنت
جميع الحقوق محفوظة لشركة سايبر وان المختصة في الامن السيبراني والجرائم الإلكترونية لا يحق لكم نقل او اقتباس اي شيء بدون موافقه الشركة قد يعاقب عليها القانون.
للتواصل info@cyberone.co
00972533392585
